ಈ ವರ್ಷದ ಆಸ್ಕರ್ ಪ್ರಶಸ್ತಿಗೆ ಸ್ಪರ್ಧಿಸಲು ಮಲಯಾಳಂನ ‘2018– ಎವರಿವನ್ ಇಸ್ ಎ ಹೀರೊ’ ಸಿನಿಮಾ ಅಧಿಕೃತವಾಗಿ ಪ್ರವೇಶ ಪಡಿದಿದೆ.

ಇಂದು ಚೆನ್ನೈನಲ್ಲಿ ಫಿಲ್ಮ್ ಫೆಡರೇಷನ್ ಆಫ್ ಇಂಡಿಯಾ ಈ ವಿಷಯವನ್ನು ಪ್ರಕಟಿಸಿದೆ. ಸುದ್ದಿಗೋಷ್ಟಿ ನಡೆಸಿದ ಫಿಲ್ಮ್ ಫೆಡರೇಷನ್ ಆಯ್ಕೆ ಸಮಿತಿಯ ಅಧ್ಯಕ್ಷ ಗಿರೀಶ್ ಕಾಸರವಳ್ಳಿ ಅವರು ಆಯ್ಕೆ ಮಾಡಿದ ವಿಷಯವನ್ನು ತಿಳಿಸಿದರು. 16 ಜನ ಜ್ಯೂರಿಗಳಿರುವ ತಂಡವು ಈ ಸಿನಿಮಾವನ್ನು ಆಯ್ಕೆ ಮಾಡಿದೆ. 2024ರ ಆಸ್ಕರ್ ಪ್ರಶಸ್ತಿಯ 'ಅತ್ಯುತ್ತಮ ಅಂತರರಾಷ್ಟ್ರೀಯ ವೈಶಿಷ್ಟ್ಯದ ಚಿತ್ರ' ವಿಭಾಗಕ್ಕೆ 2018 ಸಿನಿಮಾವನ್ನು ಕಳುಹಿಸಿಕೊಡಲಾಗಿದೆ ಎಂದು ಹೇಳಿದರು.

ಆಯ್ದ 22 ಚಿತ್ರಗಳನ್ನು ವೀಕ್ಷಿಸಿ ಈ ಚಿತ್ರವನ್ನು ಆಯ್ಕೆ ಮಾಡಲಾಗಿದೆ. ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಚಿತ್ರಗಳನ್ನು ಆಯ್ಕೆ ಮಾಡಲಾಗಿತ್ತು. 2018 ಸಿನಿಮಾವು ‘ಕೆಟ್ಟ ಪರಿಸ್ಥಿತಿಯಲ್ಲಿ ಭಾರತೀಯರು ಮತ್ತು ಅವರ ನೈತಿಕತೆಯನ್ನು ಈ ಸಿನಿಮಾ ಎತ್ತಿ ತೋರಿಸುತ್ತದೆ’ ಎಂದು ತಿಳಿಸಿದರು.

ಕೇರಳದಲ್ಲಿ 2018ರಂದು ಉಂಟಾದ ಭಾರಿ ಪ್ರವಾಹದ ಕುರಿತು ಮಾಡಿರುವ ಈ ಚಿತ್ರವು ಜನರ ಸೆಣಸಾಟ, ಮಾನವೀಯತೆ, ನೈತಿಕತೆ ಬಗೆಗಿನ ಕಥೆಯನ್ನು ತೆರೆದಿಡುತ್ತದೆ. 2018 ಸಿನಿಮಾಕ್ಕೆ ಜೂಡ್ ಆಂಟನಿ ಜೋಸೆಫ್ ನಿರ್ದೇಶನ ಮಾಡಿದ್ದಾರೆ. ತೋವಿನ್ ಥಾಮಸ್, ತನ್ವಿ ರಾಮ್ ಪ್ರಮುಖ ತಾರಾಗಣದಲ್ಲಿದ್ದಾರೆ. ಮಲಯಾಳಂನಲ್ಲಿ ಈ ಚಿತ್ರ ಕಮರ್ಷಿಯಲ್ ಆಗಿಯೂ ದೊಡ್ಡ ಯಶಸ್ಸು ಪಡೆದು ₹200 ಕೋಟಿಗೂ ಅಧಿಕ ಹಣ ಗಳಿಕೆ ಮಾಡಿದೆ.

ಕಳೆದ ವರ್ಷ ಫಿಲ್ಮ್ ಫೆಡರೇಷನ್ ಆಫ್ ಇಂಡಿಯಾದ ವತಿಯಿಂದ ಗುಜರಾತಿ ಸಿನಿಮಾ Chhello Show ಅನ್ನು ಕಳುಹಿಸಿ ಕೊಡಲಾಗಿತ್ತು. ಆದರೆ ‍ಪ್ರಶಸ್ತಿ ಪಡೆದಿರಲಿಲ್ಲ. ಸ್ವತಂತ್ರವಾಗಿ ಸ್ಪರ್ಧಿಸಿದ್ದ RRR ಚಿತ್ರ ಅತ್ಯುತ್ತಮ ಮೂಲ ಹಾಡು ವಿಭಾಗದಲ್ಲಿ ಹಾಗೂ ಅತ್ಯುತ್ತಮ ಡಾಕ್ಯುಮೆಂಟರಿ ವಿಭಾಗದಲ್ಲಿ The Elephant Whisperers ಆಸ್ಕರ್ ಪ್ರಶಸ್ತಿ ಪಡೆದಿದ್ದವು.

2024 ನೇ ಸಾಲಿನ ಆಸ್ಕರ್ ಪ್ರಶಸ್ತಿ ವಿತರಣೆ ಸಮಾರಂಭ ಮುಂದಿನ ವರ್ಷ ಮಾರ್ಚ್ 10 ರಂದು ಲಾಸ್ ಏಂಜಲೀಸ್‌ನಲ್ಲಿ ನಿಯೋಜನೆಗೊಂಡಿದೆ.